បែកធ្លាយរឿង អធិការក្រុងខេមរៈភូមិន្ទ ឲ្យ​ម្ចាស់​ម៉ូតូស្ម័គ្រចិត្តចូល​បង់លុយ​១០០​ដុល្លារ ​ក្នុង​មួយគ្រឿង ទើបចេញបាន

អាម៉ាប៉ាប៉ាញ៉ូស

កោះកុងៈ បន្ទាប់ពីបានចុះបង្ក្រាបល្បែងស៊ីសងភ្នាល់មាន់ក្នុងទូរទស្សន៍មួយកន្លែង ស្ថិតនៅក្នុងភូមិស្ទឹងវែង សង្កាត់ស្ទឹងវែង ក្រុងខេមរភូមិន្ទ កាលពីថ្ងៃទី១៨ ខែតុលា ឆ្នាំ២០១៧ កម្លាំង​នគរបាលដកបានម៉ូតូចំនួន១៣គ្រឿង C១២៥ ចំនួន៦គ្រឿង WAVE ៣គ្រឿង ZOOMER ១គ្រឿង APR ១គ្រឿង VIVA ១គ្រឿង និង SMAK ១គ្រឿង រួមទាំងស្បែកជើង៤គូរ ទូរទស្សន៍ ១គ្រឿងម៉ាកសូនី កុំព្យូទ័រលេបថប ១គ្រឿង ម៉ាក DELL ក្រដាសសម្រាប់​កត់គូជល់មាន់ តុដែក១ និងបានហៅម្ចាស់កាន់កាប់ទីកន្លែង ឈ្មោះ កែវ ធារី ភេទស្រី អាយុ២៧ឆ្នាំ ជាអ្នកលក់ភេសជ្ជៈនៅទីកន្លែងបង្ក្រាបមកសាកសួរ។

​ទើបបែកធ្លាយរឿង អធិការ​ក្រុង​ខេមរភូមិន្ទ ​បាន​ដោះលែង​ម៉ូតូ ដែល​រិ​ប​អូស​បាន​ពី​ការបង្ក្រាប​ហាង​កាហ្វេចាក់មាន់ជល់តាមទូរទស្សន៍នោះ ​ប្រគល់​ឲ្យ​ម្ចាស់​វិញ​ហើយ ព្រោះតែ​រក​មិនឃើញ ថា ពួកគេ​មាន​កំហុស ឬ​ពុំ​អា​ចរក​ភស្តុ​ង​តាង​ដាក់បន្ទុក​ជនរងគ្រោះ​បាន។

ប៉ុន្តែ​លោក​អធិការ មិនបាន​ដោះលែង​ដោយ​ស្រួលៗ នោះទេ គឺ​ឲ្យ​ម្ចាស់ម៉ូតូ ពួកគាត់ស្ម័គ្រចិត្ត បង់លុយ​១០០​ដុល្លារ​ក្នុង​មួយគ្រឿង (ទាំងអស់​១៣​គ្រឿង ) ជា​ថ្នូរ​នឹង​ការដោះលែង​យក​ម៉ូតូ​មកវិញ។​

​តាមរយៈ​នោះ ​ប្រជាពលរដ្ឋ​បាន​អំពាវនាវ​ដល់​អគ្គស្នងកា​រ​នគរបាលជាតិ ​ក៏ដូចជា​រដ្ឋមន្ត្រីក្រសួង​មហាផ្ទៃ​មេត្តា ស្រាវជ្រាវ​ករណី​ខាងលើនេះ ដើម្បី​ទប់ស្កាត់​សកម្មភាព​ជិះជាន់​ប្រជាពលរដ្ឋ​ពី​​មន្ត្រីនគរបាលថ្នាក់ក្រោម​ជាបន្ទាន់​ផង ក្នុងពេលដែល​សម្តេច ហ៊ុន សែន កំពុងតែ​ថ្នាក់ថ្នម​សភាពការន​យោបាយ​តាមរយៈលើកទឹកចិត្ត​ប្រជាពលរដ្ឋ។​

​ពាក់ព័ន្ធ​ការរិះគន់​ខាងលើ CAM POST នៅ​មិនទាន់​អាច​សុំ​ការបកស្រាយ ឬ​បំភ្លឺ​ពី​លោក ហេង លាង អធិការក្រុងខេមរៈភូមិន្ទនៅឡើយ​ទេ។

ប៉ុន្តែ​យើង​នឹង​ព្យាយាម​គ្រប់​លទ្ធភាព ដើម្បី​ស្វែងរក​ការបកស្រាយ​ពី​លោកស្នងការ ឬ​មន្ត្រី​ពាក់ព័ន្ធ ហើយ​រាយការណ៍​ជូន​ប្រិយមិត្ត​អ្នកតាមដាន​នៅពេល​បន្ទាប់​ទៀត៕

@Amapapa.News